Бондын зах зээлийн тойм | 8-р сарын 17, 2026

Цөлжилттэй тэмцэх тухай НҮБ-ын конвенцын талуудын 17-р бага хурал албан ёсоор эхэллээ. Нийт газар нутгийн 77% нь цөлжилт болон газрын доройтолд өртсөн Монгол улсын хувьд энэ удаагийн хурлыг зохион байгуулж буй нь өндөр ач холбогдолтой байгааг Faversham House судалгааны байгууллага онцолж байна.

Цөлжилтийн эрсдэлд өндөр өртөмтгий манай улсын хувьд газрын доройтлыг бууруулах, нөхөх сэргээх зорилтуудтай уялдсан олон талт санхүүжилтийг татах боломжоо нэмэгдүүлж, төлбөрийн чадвараа сайжруулах гарц гаргалгаа эрэлхийлэх нь зүйтэй байгааг судлаачид зөвлөж байна.

Аливаа улсын байгаль орчин, экологийн нөхцөл доройтох нь зээлжих зэрэглэлд шууд нөлөө үзүүлэх өндөр магадлалтай байгааг Лондоны эдийн засаг, улс төрийн шинжлэх ухааны сургуулийн (LSE) эрдэмтэд тооцоолсон байна.

Тухайлбал, 53 хөгжингүй болон хөгжиж буй орны 2000-2020 оны хоорондох эдийн засгийн дата мэдээлэлд үндэслэн судлахад байгаль орчны доройтол нь 2 болон 5 жилийн хугацаатай ЗГ-ын бондын өгөөжийг дунджаар 25-70 суурь нэгжээр өсгөхөд нөлөөлж байгааг тооцоолжээ.

Үүнээс гадна 2050 он хүртэл хөгжиж буй 119 гаруй улсын 60 нь зээлжих зэрэглэл нь буурах эрсдэлтэй түвшинд үнэлэгдсэн болохыг Fitch агентлагаас тооцоолсон байна. Тус агентлагын боловсруулсан “Climate Vulnerability Signals” гэх шинжилгээний арга хэрэгсэл нь хөгжиж буй орны уур амьсгалын эрсдэл болон эрчим хүчний шилжилтийг 100 хүртэлх оноогоор үнэлдэг бөгөөд эндээс Монгол улстай төстэй эдийн засгийн бүтэцтэй орнуудын зэрэглэл буурах өндөр магадлалтай байгааг анхааруулжээ.

Тиймээс уул уурхайн экспортод өндөр хамааралтай Монгол Улсын хувьд уур амьсгалын эрсдэлээс гадна эрчим хүчний шилжилтийн эрсдэл нь зээлжих зэрэглэлд ач холбогдол өндөртэй хүчин зүйл болж байна.

Монголбанкны мөнгөний бодлогын хороо ээлжит бусаар хуралдаж бодлогын хүүгээ 50 суурь нэгжээр нэмэгдүүлж, 12.5%-д хүргэхээр шийдвэрлэлээ. Сүүлд 2025 оны III сард өсгөснөөс хойш зургаан удаагийн хурлаар 12 хувьд хадгалсан бодлогын хүүг өсгөхөд инфляц болон геополитикийн хүчин зүйлс голчлон нөлөөлжээ.

TME компани 2026 оны эхээр олон улсын зах зээлд гаргасан $300 саяын бонд дээрээ (tap issuance) хийж, нэмэлтээр $100 саяыг амжилттай татан төвлөрүүллээ. Шинэ бондын захиалга 3.3 дахин давж, хөрөнгө оруулагчдын эрэлт өндөр байсныг харууллаа. 

Одоогоор бондын нөхцөл болон гаргасан үнийн талаарх мэдээлэл хараахан ил болоогүй байна. Moody’s агентлагаас компанийн 300 сая ам.долларын бондын зээлжих зэрэглэлийг B2, төлөвийг “тогтвортой” гэж үнэлсэн юм.